Eqqagassalerinermut suliassaqarfik Naalakkersuisut aamma kommunit akornanni avitaavoq.
Tamatuma kingunerisaanik kommunit pingaarnertut oqartussaasuupput, eqqagassalerinermut igitsisarnermullu akisussaasuullutik. Naalakkersuisut inatsisini tunngavissanik pisariaqartunik qulakkeerinninnissaq aammalu kommunit qanimut suleqatigalugit eqqagassalerinermut suliassaqarfiup ineriartorteqqinnerata malinnaaffiginissaa – peqataaffiginissaalu – akisussaaffigaat. Pingaarnertigut eqqakkat atorluarneqarlutik isumalluutinillu maangaannartitsinani, eqqakkat avatangiisinut peqqissutsimullu illersorneqarsinnaasumik passunneqarnissaat, ukkatarineqarpoq.

Kommunini ataatsimoorussamik eqqaavilerinermut ingerlatseqatigiiffik ESANI A/S

Kommunini ataatsimoorussamik eqqaavilerinermut ingerlatseqatigiiffik ESANI A/S nunami namminermi ikuallaavinnik nutaaliaasunik marlunnik, nunarput tamakkerlugu eqqakkanik tigusisinnaasussanik, pilersitsissaaq ingerlatsissallunilu. Ikuallaaviit Nuummi Sisimiunilu inissinneqarput. Nunami namminermi eqqagassalerinermi aaqqiissutissat atuutilerneranni kommunit ataasiakkaat eqqakkanik ikuallanneqarsinnaasunik katersinissaq, poortuinissaq aammalu umiarsualivimmut qaninnerpaamut, ESANI A/S-imit aaneqarfissaannut passunneqarfissaannullu, assartuinissaq suli akisussaaffigaat.

Eqqagassalerinermut iliuusissanut pilersaarut 2020-2031

Naalakkersuisut eqqagassalerinermut suliassaqarfimmi politikkiat anguniagaallu 2020- 2031-mi Eqqagassalerinermut iliuusissanut pilersaarummi nassuiarneqarput.

Eqqakkanik ikuallaanermut, igitsisarnermut, immikkoortiterinermut atoqqiinissamullu aaqqiissutissat pitsanngorsarnissaat, kommunit qanimut suleqatigalugit Naalakkersuisut sulissutigaat. Eqqagassalerinermut iliuusissanut pilersaarut 2020-2031 oqartussat eqqagassalerinermut suliassaqarfimmi sulineranni tunngavissaliivoq. Eqqagassalerinermut suliassaqarfimmi suliniutissat Eqqagassalerinermut iliuusissanut pilersaarummi nassuiarneqartut, Naalagaaffiit Peqatigiit piujuartitsiviusumik ineriartortitsinermut nunarsuarmi anguniagaasa naammassinissaannut tapersiipput. Pingaartumik silaannarmut, imermut nunamullu aniatitsinerit annikillisinneqarpata, atoqqiisarneq annertunerulerpat aammalu eqqakkanik ikuallaanermit piujuartitsiviusumik ungasianiit kiassarnermut tunisassiorneq, annertuunik pitsanngorsaanernik malitseqartussaapput.

Plastikkit

Naalakkersuisut plastikkinik atuinerup annikillisinnissamut suliniutissanut pilersaarutaat uani atuarneqarsinnaavoq.

Suliniutissanut pilersaarummi suliniutissat aalajangersimasut, plastikkinik atuinitsinnik annikillisitsisussat aammalu plastikkinik eqqagassaalersunik isumaginniffiusussat, saqqummiunneqarput.

Aalisarnermut, piniarnermut aallaaniarnermullu atortut

Naalakkersuisut aalisarnermut, piniarnermut aallaaniarnermullu atortunut annaasanut qimaannakkanullu suliniutissanut pilersaarutaat uani atuarneqarsinnaavoq.

Avatangiisinut Upalungaarsimanermullu Immikkoortortaqarfiup suleqatigisat peqatigalugit suliniutissanut pilersaarummi suliniutissat, ilanngullugit aalisarnermut atortunik annaaneqarsimasunik annertunerusumik saliinissaq qanoq sapinngisamik pitsaanerpaamik aaqqissuunneqarsinnaanersoq suliarai.

Inatsisit

Eqqagassalerinermut suliassaqarfik Avatangiisit innarlitsaaliorneqarnissaanik Inatsisartut Inatsisaat nr. 9, 22. novembari 2011-meersumi kapitali 7-imi aamma eqqakkat pillugit Namminersorlutik Oqartussat nalunaarutaat nr. 3, 7. januaari 2021-imeersumi maleruagassiivigineqarpoq.

Avatangiisinut Upalungaarsimanermullu Immikkoortortaqarfiup aalajangiineri matuma kinguliani takuneqarsinnaapput:

ASN: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik ulloq 27. februari 2024-mi aalajangiivoq, Maniitsumi umiarsualiviup iluarsartuunneqarnissaanut ASN-imut akuersissuteqartoqarnissaanut piumasaqaateqarfiussanngitsoq.
Aalajangiinerup oqaasertaa tamarmiusoq uani atuarneqarsinnaavoq.

ASN: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik 27. oktobari 2023-mi aalajangiivoq, Ilulissani mittarfiliornermut ASN-imut akuerisamut atatillugu suliassamut allannguutissaq, hangariliornermi suliassamut tunngasoq ASN-iliortussaatitaaffiussanngitsoq.
Aalajangiinerup tamakkiisumik oqaasertai uani atuarneqarsinnaapput

ASN: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik 05. septembari 2023-mi aalajangiivoq, Qeqertaq Avallermi umiarsualivik nutaaq (Nuuk Sikuki Harbour) ASN-imut akuersissuteqarnissamut piumasaqaateqarfiussasoq.
Aalajangiineq tamakkiisumik oqaasertalik uani atuarneqarsinnaavoq.

ASN: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik 17. maaji 2023-mi aalajangiivoq, Ilulissani mittarfiliornermi ASN-imut akuersissuteqarfiusumi piffissap qaartiteriffiusartup allanngortikkallarneqarnissaa ASN-imut akuersissuteqartoqarnissaanut piumasaqaateqarfiussanngitsoq.
Aalajangiinerup oqaasertaa tamarmiusoq uani atuarneqarsinnaavoq atuarneqarsinnaavoq.

ASN: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik 30. maaji 2023-mi aalajangiivoq, Kullorsuarmi umiarsualivimmik alliliinissaq ASN-imut akuersissuteqartoqarnissaanut piumasaqaateqarfiussanngitsoq.
Aalajangiinerup oqaasertaa tamarmiusoq uani atuarneqarsinnaavoq.

ASN: ulloq 16. decembari 2022-mi Nunalerinermut, Imminut Pilersuinermut, Nukissiutinut Avatangiisinullu Naalakkersuisoqarfiup Glacier Lodge Eqi-mi (Ilulissat avannaani) alliliinissaq pillugu aalajangiuppaat ASN-imut akuersissut pillugu piumasaqaammik atuinissamut tunngaviliinngitsoq.
Aalajangiussap oqaasertai tamakkiisut uani atuarneqarsinnaavoq.

"IMEQARFIUP KILLEQARFIA PILLUGU SULIAQ: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik 17. oktobari 2022-mi aalajangiivoq, Qeqqata Kommunianiit Sisimiuni imeqarfiup killeqarfia aqqusaarlugu qamutit assakaasullit amerlanerusut angalasinnaalernissaannut qinnuteqaataa, 29. Juuni 2022-mi ullulerneqartoq itigartinniarlugu. Aalajangiineq tamarmiusoq uan atuarneqarsinnaavoq.

Aalajangiinerit ilai quppernermi matumani nassaarisinnaanngikkukkit, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik attaveqarfigisinnaavat uani: pan@nanoq.gl

Upalungaarsimaneq ingerlalluartoq, nunatsinni innuttaasut tamarmik toqqissisimanissaat qulakkeerniarlugu suliaqarnermi tunngaviusumik pingaaruteqarpoq. Annaassiniarnermut upalungaarsimasut aamma imaani akisussaaffeqarfimmi avatangiisinut upalungaarsimasut immikkoortinneqartarput.

Annaassiniarnermut upalungaarsimasut

Kommunit annaassiniarnermut upalungaarsimasunik ingerlatsisuupput, taakkualu suliassaraat ajutoornerni ajunaarnersuaqarneranilu imaluunniit tamatumunnga annertuumik navianartorsiornerni inuit, pigisat avatangiisillu ajoquserneqarnissaannik pitsaaliuinissaq, killilersimaarnissaa ikiorsiinissarlu. Naalakkersuisut annaassiniarnermut upalungaarsimasunut nakkutilliisuupput.

Inatsisit – Annaassiniarnermut upalungaarsimasut

Annaassiniarnermut upalungaarsimasut Kalaallit Nunaanni annaassiniarnissamut upalungaarsimaneq aamma ikuallattoornissamik qaartoornissamillu pitsaaliuinermi iliuusissat pillugit Inatsisartut Inatsisaat nr. 14, 26. maaji 2010-meersumi, Qaartiterutissat pillugit Namminersornerullutik Oqartussat nalunaarutaat nr. 16, 16. juuli 2007-imeersumi aamma Kommunini annaassiniarnermut upalungaarsimasut annertussusissaannut minnerpaaffissaat pillugit Namminersorlutik Oqartussat nalunaarutaat nr. 62, 1. novembari 2021-mersumi maleruagassiivigineqarput.

Kalaallit Nunaata Upalungaarsimanermut ataatsimiititaliaa

Kalaallit Nunaanni upalungaarsimaneq pillugu apeqqutit pillugit Naalakkersuisunut siunnersuinissaq kiisalu ajornartoornernik pisoqarnerani paasissutissanut tunngavissanik tamakkiisunik pissarsinissaq aammalu periusissatigut oqartussat ingerlataasa akuutinneqartut ataatsimoortinneqarnissaat siunertaralugit, Kalaallit Nunaata Upalungaarsimanermut ataatsimiititaliaq pilersinneqarpoq.

Kalaallit Nunaata Upalungaarsimanermut ataatsimiititaliaa aalajangersimasunik 7-nik ilaasortaqarpoq aammalu aalajangiisinnaatitaanatik peqataasartut, Kalaallit Nunaanni Danmarkimilu oqartussanit aallartitat, pingasuullutik.

Kalaallit Nunaata Upalungaarsimanermut ataatsimiititaliaa Kalaallit Nunaanni annaassiniarnissamut upalungaarsimaneq aamma ikuallattoornissamik qaartoornissamillu pitsaaliuinermi iliuusissat pillugit Inatsisartut Inatsisaat nr. 14, 26. maaji 2010-meersumi § 3 naapertorlugu pilersinneqarpoq.

Search And Rescue (SAR)

Kalaallit Nunaanni ujaasinerit annaassiniarnerillu (SAR) naalagaaffiup suliassaqarfigaa. Tamatuma kingunerisaanik pingaarnertigut akisussaaffik Danmarkimi Illersornissamut ministereqarfimmi aamma Inatsisinik Atuutsitsinermut ministereqarfimmi pisussaaffigineqarpoq. Suliaqarnermi tamanna isumaqarpoq Politiit aamma Issittumi Sakkutooqarfiup, SAR-imi suliaqarnerit isumagisarigai.

Imeq imigassarput kuunniit tatsiniillu pissarsiarisarparput. Imeq suliarineqanngitsoq atuisartunut imigassatut pilersuutigineqannginnerani imeqarfinni salinneqartarput suliarineqartarlunilu. Nukissiorfiit Kalaallit Nunaat tamakkerlugu illoqarfinni nunaqarfinnilu imeqarfitsigoortumik imermik imerneqarsinnaasumik minguitsumik pilersuinissaq akisussaaffigaa.

Imeqarfinnut killeqarfiit

Tatsit kuuillu imermik imigassatsinnik aallerfigisartakkagut kaajallallugit illersuiffissatut killeqarfilersugaapput, imeqarfinnut killeqarfinnik taaneqartartunik. Erngup imigassap mingutsinneqarnissaanut aarlerinaataasut annikillisinniarlugit, imeqarfinnut killeqarfiit iluanni ingerlatassat arlallit inerteqqutigineqarput. Assersuutigalugu imeqarfinnut killeqarfinni qamuteralannik ingerlaaqqusaanngilaq.

Uani imeqarfinnut killeqarfiit iluini soqqusaanersoq aamma soqqusaannginnersoq filmiliaq takusinnaavat.

Sooq imeqarfinnut killeqarfiit inissisimaffii taamaannersut filmiliaq uani takusinnaavat.

Misissuisarneq nakkutilliinerlu

Naalakkersuisoqarfik erngup pitsaassussaanut nakkutilliinermut oqartussaavoq aammalu imermik pilersuiffinnut nakkutilliisuulluni. Erngup pitsaassusiani ilaatinneqarput bakterianik sumiiffiinilu kemi atorlugu imermik misissugassat, ingerlaavartumik misissorneqartartut.

Imermit misissugassaq naammaginartumik pitsaassuseqanngippat, Nunatta Nakorsaanera suleqatigalugu suliniutissat suut aallartinneqassanersut naliliisoqartarpoq. Tamanna assersuutigalugu tassaasinnaavoq qalaassinissamik inassuteqarneq imaluunniit atuinerup killilersorneqarnera.

Kommunit imeqarfinnut killeqarfinnut nakkutilliisuupput.

Inatsisit

Imeq imerneqarsinnaasoq aamma imeqarfinnut killeqarfiit avatangiisit innarlitsaaliorneqarnissaanik Inatsisartut Inatsisaat nr. 9, 22. novembari 2011-meersumi (pingaartumik kapitali 6),  erngup imerneqarsinnaasup pitsaassusia aamma imermik pilersuiviit nakkutigineqarnerat pillugit Namminersorlutik Oqartussat nalunaarutaat nr, 63, 4. novembari 2021-mersumi aamma Imeqarfissatut isumalluutinik mingutsitsinaveersaarnissaq imerineqartussamillu imeqarfiliorneq pillugit Namminersornerullutik Oqartussat Nalunaarutaat nr. 9 15. apriili 1993-imeersumi maleruagassiivigineqarput.

Aalisakkat eqqagassartaannik imaluunniit immap naqqani atortussiassanik imaani avatangiisinut eqqaasoqarsinnaanissaa sioqqullugu tamatumunnga akuersissummik qinnuteqartoqassaaq. Akuersissuteqarneq nalunaarutigineqariinngippat, eqqaaqqusaanngilaq.

Qaqugukkut eqqaanissamut akuersissummik qinnuteqartoqarsinnaava?

Imaani avatangiisini eqqaanissamut akuersissummik qaqugukkut qinnuteqartoqassanersoq, imaani avatangiisit illersorneqarnissaat pillugu Inatsisartut Inatsisaat nr. 15, 8. juuni 2017-imeersumi kapitali 10-mi allassimavoq. Akuersissummik tunniussisinnaalinnginnermi piumasaqaatit naammassineqarsimasussat inatsimmut ilanngussaq 3-mi allassimapput.

Misissuisarneq nakkutilliinerlu

Eqqaanissamut akuersissummi atugassarititaasut naammassineqarnersut, assersuutigalugu aalisakkat eqqagassartaannik eqqaanermut atatillugu, Avatangiisinut Upalungaarsimanermullu Immikkoortortaqarfik misissuisarpoq nakkutilliisarlunilu.

Inatsisit

Eqqaasarneq imaani avatangiisit illersorneqarnissaat pillugu Inatsisartut Inatsisaat nr. 15, 8. juuni 2017-imeersumi (pingaartumik kapitali 10) maleruagassiivigineqarpoq. Immap naqqani atortussiassanik qaqinneqarsimasunik eqqaanissamut akuersissutit pillugit Ilanngussaq 3, tamatumunnga tunngatillugu takuuk.

Imaani avatangiisinut inatsit imaani mingutsitsinernut umiarsuarneersunik aamma timmisartuneersunik ataatsimoortumik maleruagassiiviuvoq. Tassani ilaatigut pineqarput uuliamik allanillu imerpalasunik ajoqusiisartunik imaarsinissamut inerteqquteqarneq, eqqakkanik igitsinissamut inerteqquteqarneq, imeq oqimaaloqutaasoq pillugu maleruagassiineq, imermik errortuviikunik imaarsisarneq aamma silaannarmik mingutsitsineq kiisalu akuutissanik atortussanillu aalajangersimasunik igitsinissamut akuersissuteqartarneq. Taanna upalungaarsimaneq mingutsitsinermillu alapernaarsuineq pillugit maleruagassanik aammalu umiarsuarnut qimaannakkanut akuliunnissamut periarfissamik, imaqarpoq.

Nunamit aallaavilimmik imaani mingutsitsineq

Nunamit aallaavilimmik imaani mingutsitsineq, tassa imaappoq imaani mingutsitsineq imermik errortuivikunik assigisaannillu nunamiit kuutsitsinernik pissuteqartut, inatsimmi pineqartunut ilaatinneqanngillat. Taamatut mingutsitsineq Avatangiisit innarlitsaaliorneqarnissaanik Inatsisartut Inatsisaat nr. 9, 22. novembari 2011-meersumi maleruagassiivigineqarpoq (takuuk Imikoorneq pillugu immikkoortoq).

Uuliakoornernik akiuiniarneq

Uuliakoornernik allanillu akuutissanik navianartunik mingutsitsinermik akiuiniarnissamut akisussaaffik danskit naalagaaffiata aamma Namminersorlutik Oqartussat akornanni avitaavoq, mingutsitsineq sumi pinersoq aammalu qanoq annertutiginersoq apeqqutaallutik (takuuk Upalungaarsimaneq pillugu immikkoortoq).

Imaani akisussaaffeqarfimmi avatangiisinut upalungaarsimaneq

Imaani avatangiisinut suliassaqarfik Kalaallit Nunaata aamma Danmarkip akornanni avitaavoq.

Naalakkersuisut sinerissap killeqarfianiit 3 sømilit angullugit imaani akisussaaffeqarfimmi inatsisiliornissamut aalajangiisinnaatitaapput aammalu avatangiisini upalungaarsimaneq akisussaaffigalugu. Sinerissap qanittuani mingutsitsinermik akiuiniarneq oqartussat allat suleqatigalugit najukkami upalungaarsimasut atorlugit amerlanertigut pisarpoq.
Danmarki 3 sømilinut killeqarfiup avataani aammalu 200 sømilit angullugit imaani avatangiisinut inatsisiliornissamut aalajangiisinnaatitaavoq aammalu imaani avatangiisini upalungaarsimaneq akisussaaffigalugu.

Imaani akisussaaffeqarfiup avataani uuliamik mingutsitsinermut akiuiniarneq danskit imaani avatangiisinut inatsisai atuuttut naapertorlugit isumagineqartussaapput.

Naalakkersuisut uuliakoornernut upalungaarsimanermut atortoqarput illoqarfinni 12-ini qatserisarfinni inissisimasunik, annikinnerusumik uuliamik mingutsitsisoqartillugu kommunit qatserisarfiinit atorneqartartunik.

Tunngaviusunut isumaqatigiissut

Naalakkersuisut Kalaallit Nunaata imartaanni uuliamik akuutissanillu uumaatsunik annertuumik mingutsitsisoqartillugu danskit naalagaaffiat mingutsitsinermik akiuiniarnissamik qinnuigisinnaavaat. Danskit naalagaaffiata mingutsitsinermik akiuiniarnissamik qinnuiginninnerup taamaattup akuerinissaanut aningaasartuutillu akilernissaannut pisussaaffeqarpoq (takuuk Tunngaviusunut isumaqatigiissut) [link til “Principaftale - DK”].

Inatsisit

Imaani avatangiisit avatangiisit innarlitsaaliorneqarnissaanik Inatsisartut Inatsisaat nr. 9, 22. novembari 2011-meersumi aamma imaani avatangiisit illersorneqarnissaat pillugu Inatsisartut Inatsisaat nr. 15, 8. juuni 2017-imeersumi maleruagassiivigineqarput.

Avatangiisinut Aningaasaateqarfik sunaava?
Avatangiisinut Aningaasaateqarfiup, Kalaallit Nunaanni avatangiisinut iluaqutaasutut suliniutaasut tapersersorpai. Inatsisartut ukiakkut 2018-imi Avatangiisinut Aningaasaateqarfimmik pilersitsisoqarnissaa aalajangiuppaat.

Avatangiisinut Aningaasaateqarfiup nuna tamakkerlugu avatangiisinut tunngassuteqartunut suliat pingaarutillit pitsanngorsaataasut tapersersussavai.

Aningaasaliissutaasut suliniutinut nutaanut misileraanermut atorneqassapput, taamalilluni avatangiisinut mingutsisinngitsumik atuineq siuarsarneqassammat

Suut tapiissutigineqartussatut qinnuteqaatigineqarsinnaappat?
Ukioq 2024-mi aningaasaliissutigineqartunut makkununnga tapiiffigineqarnissamik qinnuteqartoqarsinnaavoq.

• Anartarfilerinermi imermullu errortuutikumut aaqqiissutissanut misiligutitut suliat. Suliassaqarfiup taassuma iluani suliassanut katillugit 3 mio. koruunit immikkoortinneqarput.
• Aalisarnermi atortunik annaasanik piniariartarfinnillu saliineq. Suliassaqarfiup taassuma iluani suliassanut katillugit 2,5 mio. koruunit immikkoortinneqarput.
• Eqqagassalerinermik piorsaanermut tunngatillugu kommunini suliat. Kommuninut 7,5 mio. koruunit atugassatut immikkoortinneqarput, taakkulu suliassanut ataqatigiissaariffiusunut atorneqassapput.
• Suliassat, innuttaasut suliffeqarfiilluunniit avatangiisinik eqqumaffiginninnerulernissaannik, kiisalu suliassat, eqqakkanik immikkoortiterisarnermik, atueqqittarnermik, issunngortitsisarnermik siuarsaaffiusut, imaluunniit suliassat plastikkit seqummaanik kuutsitsinermik annikillititsisussat. Suliassaqarfiup taassuma iluani suliassanut katillugit 3 mio. koruunit immikkoortinneqarput.

Qaqugu qinnuteqassaanga?
Avatangiisinut Aningaasaateqarfik 4. decembari 2023-mi qinnuteqartitsilluni aallarteqqissaaq, qinnuteqarnissamut 12. februaari 2024 killiliunneqarluni.

Sumut qinnuteqassaanga?
Ukioq manna nutaatut Sullissivik.gl. aqqutigalugu suliassanut avatangiisinut siuarsaataasunut qinnuteqassaatit. Aamma MitID atornagu qinnuteqaatit allakkatigut nassiussinnaavat. Linki una iserfigiuk: Suliassamut avatangiisinut siuarsaaffiusussamut aningaasanik Avatangiisinut Aningaasaateqarfimmut qinnuteqarit (sullissivik.gl)

Kikkut tapiiffigineqarnissamik qinnuteqarsinnaappat?
Avatangiisinut suliassanut assersuutigalugu kommuuninit, inuussutissarsiuteqartunit, meeqqat atuarfianni atuartunit aamma inunnut ataasiakkaanut aningaasaliisoqarsinnaavoq.

Namminerisamik aningaasaleeqataanissaq piumasaqaataava?
Taperneqarnissamik 10.000 koruunit sinnerlugit qinnuteqaruit, minnerpaamik namminerisamik aningaasartuutissavit 25 %-ia aningaasaliissutiginissaa piumasaqaataavoq.

Taperneqarnissamik 10.000 koruuninik imaluunniit taakku ataallugit qinnuteqaruit,namminerisamik aningaasaleeqataanissaq piumasaqaataanngilaq.

Suliffeqarfiit immikkut mingutsitsisartut tassaapput suliffissuit suliffeqarfii, annertoorujussuarmik mingutsitsisartut, taamaattumillu avatangiisinut akuersissuteqarfigineqartussat. Avatangiisinut akuersissuteqarneq atugassarititaasunik suliffeqarfiup naammassisassaannik imaqarpoq, taamaalilluni taakkua ingerlatsinerat avatangiisinut peqqinnissamullu illersorneqarsinnaasumik ingerlanneqassalluni. Suliffeqarfik immikkut mingutsitsisartoq, tamatumunnga avatangiisinut akuersissuteqarneq nalunaarutigineqanngippat, sanaartoqqusaanngilaq imaluunniit allanngorteqqusaanani.

Suliffeqarfik immikkut mingutsitsisartoq suua?

Suliffeqarfiit immikkut mingutsitsisartut tassaapput suliffeqarfiit mingutsitsivallaartut il.il. avatangiisinut tunngatillugu akuersissuteqarfigineqartarnerat pillugu Namminersornerullutik Oqartussat nalunaarutaat nr. 11, 20. aggusti 2004-meersumut ilanngussaq 1-imi allattorsimasut.

Misissuisarneq nakkutilliinerlu

Avatangiisinut Upalungaarsimanermullu Immikkoortortaqarfik avatangiisinut akuersissuteqarnerit, suliffeqarfinnut immikkut mingutsitsisartunut tunniunneqartut, naammassineqarnersut, misissuisarpoq nakkutilliisarlunilu.

Inatsisit

Suliffeqarfinnut immikkut mingutsitsisartunut avatangiisinut akuersissuteqartarnerit suliffeqarfiit mingutsitsivallaartut il.il. avatangiisinut tunngatillugu akuersissuteqarfigineqartarnerat pillugu Namminersornerullutik Oqartussat nalunaarutaat nr. 11, 20. aggusti 2004-meersumi. (takukkit tassunga tunngasut ilanngussaq 1 aamma ilanngussaq 2) kiisalu avatangiisit innarlitsaaliorneqarnissaanik Inatsisartut Inatsisaat nr. 9, 22. novembari 2011-meersumi (pingaartumik kapitali 5) maleruagassiivigineqarput

Imermik errortuivikoq paasineqassaaq tassaasoq imeq sunaluunniit najugaqarfinniit, suliffeqarfinniit kiisalu illut sinneriniit kuutsinneqartoq. Imermik errortuivikup annertussusaa katitigaaneralu ukkatarineqarput, ilanngullugu pingaartumik imermik errortuivikup kuuffii nutaat sumi inissisimanersut, tassami saliisaarfiliisoqarsimanngimmat.

Tamatumunnga akuersissummik tunniussisoqarsimappat, aatsaat imermik errortuivikup imaanut kuutseqqusaavoq.

Imermik errortuivikumut suliassaqarfimmut akisussaaffik

Imermik errortuivikumut suliassaqarfimmut akisussaaffik kommunit aamma Namminersorlutik Oqartussat akornanni avitaavoq.

Kommunit pingaarnertut najukkami oqartussaapput. Kommunit illoqarfinnut nunaqarfinnullu imermik errortuivikumut pilersaarutinik suliaqartussaapput.
Namminersorlutik Oqartussat qitiusumi oqartussaasuupput, suliniutini nutaani inatsisini tunngavissanik pisariaqartunik qulakkeerisussat, kiisalu imermik errortuivikumut suliassaqarfiup ineriartorteqqinnissaanut malinnaasussat peqataasussallu. Naalakkersuisoqarfik suliffeqarfinnit immikkut mingutsitsisartunit imermik errortuivikut passunneqarnissaannut atugassarititaasunik aalajangersaasarpoq.

Inatsisit

Errortuutikoq anartarfiit imaannik aamma imermik errortuivikumik eqqaaneq pillugu Namminersorlutik Oqartussat nalunaarutaat nr. 10, 12. juuni 2015-imeersumi kiisalu avatangiisit innarlitsaaliorneqarnissaanik Inatsisartut Inatsisaat nr. 9, 22. novembari 2011-meersumi maleruagassiivigineqarpoq.

ASN paasineqassaaq Avatangiisinut Sunniutaasussanik Nalilersuineq. Sanaartugassaq ASN-imik pisussaaffeqarfiusoq ASN-imut nassuiaammik suliaqarnissaq pillugu piumasaqaateqarfigineqartarpoq. ASN-imut nassuiaat suliassap annertuunik avatangiisinut sunniinissaannik allaaserinninnermik imaqarpoq, peqatigisaanillu pitsaaliuinermi suliniutissat avatangiisinut sunniinerluttussanik akiuiniarfiusussat, tikkuartussaallugit. Sanaartugassaq ASN-imik pisussaaffeqarfiusoq, tamatumunnga ASN-imut akuersissuteqartoqariinngippat, aallartinneqaqqusaanngilaq.

Qaqugukkut ASN-imut pisussaaffeqartoqartarpa?

Sanaartugassat tamatigut ASN-imik pisussaaffeqarfiusussat, atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marsi 2013-meersumut ilanngussaq 1-imi allattorsimapput. Sanaartugassat nalunaarummut tassunga ilanngussaq 2-mi allattorsimasut ASN-imut pisussaaffeqarnermut misissorneqartussaapput.

Misissuisarneq nakkutilliinerlu

Avatangiisinut Upalungaarsimanermullu Immikkoortortaqarfik sanatitsisup atugassarititaasut ASN-imut akuersissuteqarnermi sanaartornerup ingerlatsinerullu immikkoortuini atuuttut malinnerai misissuisarpoq nakkutilliisarlunilu.

Inatsisit

Sanaartugassanut angisuunut ASN-imut akuersissuteqartarnerit atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marsi 2013-meersumi (takuuk tassunga tunngasut Ilanngussat 1-4) samt Avatangiisit innarlitsaaliorneqarnissaanik Inatsisartut Inatsisaat nr. 9, 22. novembari 2011-meersumi (pingaartumik kapitali 8) maleruagassiivigineqarput.