AtuartigukKinguaassiuutitigut innarliinernut annertunerusunik suliniuteqartussanngorneq
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Naalakkersuisut noqqaassuteqarnerisigut pinerluttulerinermi inatsisip allanngortinneqarnera Folketingip ullumi akuersissutigaa. Inatsimmi allannguinermi timikkut aamma digitaliusumik kinguaassiuutitigut innarliinerit imaritinneqarput aamma siunissami isumapiloqarneq tunngavigalugu tatiginnilersitsiniaaneq, grooming, aamma sextortion pinerluttulerinermi inatsimmi namminneq aalajangersakkatut ilaalissapput. Kinguaassiuutitigut innarliinerit taamaallaat timikkut innarliineruinnaassammata, kisiannili annertuumik digitaliusumik aamma innarliinerusarmata, taamaaliornerup erseqqissaavigissavaa. Tamatuma saniatigut, inuk 22-inik ukioqalereersimasoq meeqqamik 15-it inorlugit ukiulimmik atoqateqarpat, tamanna pinngitsaaliinertut isigineqassammat, aalajangersakkap nutaap aalajangersarpaa.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq ima oqaaseqarpoq:
”Piffissaq malinnaavigissagatsigu aamma kinguaassiuutitigut innarliinerit innarliiffinni tamani akiussagatsigit pingaaruteqarpoq. Isumapiloqarneq tunngavigalugu tatiginnilersitsiniaaneq, grooming, atorlugu meeqqat tatiginninnerannik atornerluineq iliuusiuvoq aserorterisoq. Inuup allap kinguaassiuutaasa assiinik imaluunniit nammineq pilluni videolianik nasseqqulluni qunusaarineq pinngitsaaliiniarnerlu killeqanngitsumik ajortuliornerupput. Taamaammat massakkut pinerluttulerinermi inatsimmi aalajangersakkat amerlineqarmata, taamaalilluni aamma innarliinernut ilutsit nutaanerusut ilanngunneqarmata, nuannaarutissaavoq”.
Inatsimmik allannguinerit ulloq 1. juli 2024 atuutilissapput.
Erseqqissaatit:
Grooming tassaavoq pisut inuup, pineqartumut kinguaassiuutitigut innarliinissaq siunertaralugu meeqqamik imaluunniit inuusuttumik tatigineqarnissaminik ineriartortitsinera, imaluunniit meeqqap inuusuttulluunniit tamataqarani assiminik imaluunniit assinik kinguaassiuutitigut iliuutsinik innarliinerusutut pissusilinnik nassitseqqullugu ussiinera.
Sextortion tassaavoq assersuutigalugu tamataqarani assit imaluunniit atortussat kinguaassiuutinut tunngassuteqartut allat siammarterneqarnissaanik qunusaarinikkut, kinguaassiuutitigut iliuutsit, pinerluttuliortup eqqunngitsuliorfigineqartumut pinngitsaaliilluni imminut iliuuserititai.
Annertunerusumik paasisaqarusukkuit ministerip allattaa Jeanette L. Petersen, jalp@nanoq.gl, oqarasuaat: +299 26 54 76 attaveqarfigiuk.