Aalisarnermut atortunut annaasanut saliinissamut Avatangiisinut Aningaasaateqarfik 3 mio. koruuninik aningaasaliivoq

Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund-ip 2023-mi aalisarnermut atortunik annaasanik qimaannakkanillu inuiaqatigiinni iliuuseqarfigineqarnissaannut 3 mio. koruuninik aningaasaliinissaq aalajangerpaa.

”Ataatsimoorluta aalisarnermut atortut annaasat iliuuseqarfigissallugit pingaaruteqarpoq. Imartatsinni aalisarnermut atortunut annaasanut unamminartunut aaqqiissutissanut tunngatillugu, aalisarnermut inuussutissarsiortunit aamma innuttaasunit annertuumik soqutigineqarnera misigivarput. Aalisarnermut atortut annaasat qallorneqarneratigut, Avatangiisinut Aningaasaateqarfik ukiuni kingullerni saliinissamut iliuuseqartunut tapersiisarpoq, aamma 3 mio. koruuninik 2023-mi suliamut uunga aningaasaliinerput tulluusimaarutigaara”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund, oqarpoq.

Aalisarnermut atortunut annaasanut saliinissamut pilersaarusiamik pilersitsileruttorput. Avatangiisinut Aningaasateqarfimmit 3 mio. koruunit, 2023-mi iliuusissamut aallartinnissamut isumannaarisuussapput. Inuiaqatigiinni iliuusissanut 3 mio. koruunit saniatigut, aalisarnermut piniarnermullu atortunut annaasanut saliinissaq pillugu 1 mio. koruunit immikkut suliniutissanut ataasiakkaanut immikkoortinneqarput.

2023-mi suliassanut, immikkoortut tallimaasut uku iluanni ingerlanneqartussanut aningaasanik qinnuteqartoqarsinnaavoq:

- Anartarfilerinermi imermullu errortuutikumut aaqqiissutissanut misiliutitut suliat. Suliassanut taakkununnga katillugit 1 mio. koruunit immikkoortinneqarput.

- Eqqagassalerinermik piorsaanermut tunngatillugu kommunini suliat. Suliassanut taakkununnga katillugit 4 mio. koruunit immikkoortinneqarput.

- Suliat, innuttaasut suliffeqarfiilluunniit avatangiisinik eqqumaffiginninnerulernerinik kinguneqartussat. Suliassanut taakkununnga katillugit 991.437 koruunit immikkoortinneqarput.

Avatangiisinut Aningaasaateqarfik pillugu uani atuagaqarit, tassanilu qinnuteqarnissamut immersugassaq nassaaralugu: https://naalakkersuisut.gl/miljoefonden

Sukumiisumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik attaveqarfigineqassaaq, e-mail: pan@nanoq.gl