Quppernerup imarisaanut ingerlaqqigit
Oqaaseq toqqaruk

Kalaallisut ( Toqqarneqarpoq )

Qallunaatut

  4. Del link
🔈 Atuartiguk

Naalakkersuisut Peqqinnissaqarfimmut aningaasaliissutit 35 mio. koruuninik ilallugit 2024-mi nukittorsaaniarput

Nassiussisuuvoq: Peqqissutsimut Naalakkersuisoqarfik
Sundhedsvæsnet

Naalakkersuisut Peqqinnissaqarfimmi suliassaqarfiit tulleriiaarinermi pingaartitat arlallit malunnaatilimmik pitsanngortinneqarnissaat qulakkeerpaat. Novemberimi 2023-mi Inatsisartuni amerlanerussuteqartut peqqinnissaqarfiup ineriartornerannut pingaarnertigut sinaakkusiisumik peqqissutsimut tunngatillugu isumaqatigiissuteqarsimapput. 2024-mut aningaasanut inatsimmi suliniutinut pingaarnerpaanut 35 mio.kr.-nik aningaasaliinissamut aningaasanik immikkoortitsisoqarsimavoq.

”Nuannaarutigaara Peqqinnissaqarfimmi pitsannguutissat aalajangersimasut arlallit maanna saqqummiussinnaagakkit. Qangaaniilli kræftertunik katsorsaasarnerup ineriartortinneqarnissaa pitsaanerulersinneqarnissaalu, nuna tamakkerlugu ernisunik sullissinerup nukittunerulersinneqarnissaa aammalu najukkani napparsimmavinni sullinneqarsinnaanerup pitsaanerulersinneqarnissaa kissaataasimavoq, maannalu peqqinnissamut aningaasaliissutiniit atuutsitsilernikkut tamanna iluatsippoq”, Peqqissutsimut Naalakkersuisoq Agathe Fontain oqarpoq.

Suliniutini ullumikkut saqqummiunneqartuni qulequttat suliniutillu, Peqqissutsimut tunngatillugu isumaqatigiissut 2023-mi novembarimeersumi allassimasut aallaavigineqarput. Tassalu pitsannguutissat taakku peqqinnissaqarfiup nukittorsarneqarnissaa pillugu sulinissamut naalakkersuinikkut sinaakkutissatut isumaqatigiissutip immikkoortuisa siullersaraat.

Kræftimut misissuisarnerit katsorsaasarnerullu pitsaanerulernissaat
Kræftimut suliniutit amerlineqarnerini innuttaasut nappaataannik piaarnerpaamik kinguarsaanertaqanngitsumillu paasinnittarnissap, misissuisarnissap katsorsaasarnissallu qulakkeerneqarnissaa siunertaavoq. 2024-mi kræfti pillugu suliassaqarfimmi, katillugit 4,7 mio. koruuninik aningaasaliiffiusussami suliniutit pingasut aallartinneqassapput.

  • Kalaallinut kræftimut tunngatillugu suliassanik ataatsimoortunik ineriartortitsinissaq, napparsimasut sukkasuumik nappaatip suuneranik katsorsaanerullu ilusissaanik qaffasissumik pitsaassusilimmik qulakkeeriffigineqarnerinik kinguneqartussaq.
  • Danmarkimi kræftimik katsorsaasarnermut annertusisamut aaqqissuussinerup ataavartunngortinneqarnissaa. Taamaalilluni napparsimasut kræftertut Kalaallit Nunaanneersut Rigshospitalip napparsimasunut Danmarkimi najugaqartunut neqeroorutaasa assinginik neqeroorfigineqartalernissaat qulakkeerneqassaaq.
  • Kræftimik katsorsaasarnermi suliassat ingerlanissaannut ataqatigiissaarisarnerit nukittorsaaffigineqassapput, taamaalillunilu napparsimasut kræftertut katsorsarneqarnerminni aalajangersimasunik attaveqarfeqalissapput. Tamatumani suliat ingerlanerisa akornuteqanngitsumik eqaatsumillu, aammalu pisariaqanngitsumik kinguarsaanertaqanngitsumik ingerlasarnissaat, aammalu misissuinermi, katsorsaanermi nakkutilliinermilu piffissaliussat malinneqarnissaasa isumannassusiata qaffatsinneqarnissaa qulakkeerniarneqarput.

Nuna tamakkerlugu naartusunik ernisunillu sullissinerup nukittorsarneqarnissaa
2024-mi nuna tamakkerlugu naartusunik ernisunillu sullissineq, katillugit 9,0 mio. koruuninik aningaasaliiffigineqartoq suliniutit pingasut aqqutigalugit nukittorsaaffigineqassaaq. Suliniutini maanna ernisarfiusut atuutiinnarnissaat, aammalu suliassaqarfimmi siunissamut ungasissumut pilersaarusiornermut atatillugu sulisut amerlinissaasa siunnerfigineqarnissaa qulakkeerneqassapput.

  • Dronning Ingridip Napparsimmavissuani (DIN) ernisarfimmi atorfiit ataatsimik amerlineqassapput, taamaalillunilu Nuummi ernisartut amerliartortut suliatigut naammaginartumik isumagineqarsinnaassallutik.
  • Sinerissami peqqissaaveqarfiit immikkoortuini naartusunik isumaginninneq ernisussiortut pingasunik aamma peqqissaasut pingasunik ilaneqarnerisigut nukittorsaavigineqassaaq.
  • Peqqinnissaqarfimmi naartusut erniartorlutik aallartussat ullormusiassaannik pilersitsisoqassaaq, taamaalillunilu napparsimasunut akunnittarfimmiinnerminni namminneerlutik nerisassanik pisisinnaalissapput nerisassiorsinnaalissallutillu. Taamatut suliniuteqarnikkut naartusut najugaqarnerminni inuussutissaqarnikkut inuunerullu pitsaassusiatigut pitsannguiffigineqarnissaat naatsorsuutigineqarpoq.

Peqqinnissaqarfimmi peqqinnissakkut sullinneqarsinnaanerinik sullinneqartarnerinillu pitsannguinissaq
2024-mi najukkani napparsimmavinni peqqissaavinnilu peqqinnissakkut sullinneqarsinnaaneq suliniutit tallimat nutaat, katillugit 16,5 mio. koruuninik aningaasaliiffigineqartut aqqutigalugit pitsannguiffiginiarneqarpoq.

  • Dronning Ingridip Peqqissaavianut attaveqarsinnaaneq sulisutigut isumalluutit amerlinerisigut ataavartussamik pitsannguiffigineqassaaq, taamaalillunilu peqqissaanermi sulisunut attaveqarniarnermi akornutaasartut taamatut amerlatigiunnaassallutik.
  • Sinerissami najugaqarfinni minnerusuni innuttaasut nalinginnaasumik nakorsiarsinnaanerisa qarasaasiatigut nakorsiartitsisarnermi sulisussanik pilersitsinikkut pitsaanerulersinneqarnissaa, taamaalillunilu najukkani peqqissaanermi sulisut taarsinngikkaluarlugit nakorsaqarnikkut sullinneqarnerup nukittunerulernissaa qulakkeerneqassaaq. Taamaalilluni Peqqinnissaqarfik ulluinnarni nappaataasartunik, pilertortumik passuttarialittut isigineqanngitsunik isumaginninnissamut pitsaanerulersinneqassapput. Nappaatit taakku tassaasinnaapput sukkorneq, aap naqitsineranik qaffasittoorneq, nappaatit kinguaassiutitigut tuniluuttartut, kigulluutit kiisalu meeqqanut akiuussutissanik kapuisarneq.
  • DIH-p pilattaasarfiani atorfiit amerlineqassapput, tamatumalu saniatigut seeqqumikkut siffissamikkullu pilatsittussat allattorsimaffianni allatsissimasut ikilisinniarlugit sulineq ingerlateqqinneqassaaq. Napparsimasut pilatsittut isumannaassusiinik qaffaaniarluni nakkutilliisarfimmik pilersitsisoqassaaq – taamaalillunilu pilattartissimasut, pinasuartumik passunneqarsimallutik nakkutigineqarnissamik pisariaqartitsinerusut peqqissaasunit eqqortunik piginnaaneqartunit sullinneqarsinnaassapput. Napparsimasut isumannaassusiisa attanneqaannarneratigut pilattartissimasunik peruluttunik sullissinerup pitsaassusianik qaffaanerussaaq, aammalu immikkoortortani peqqissaanikkut suliallit sulisoriinnarnissaannik qulakkeeriffiussalluni.
  • DIH-mi nakorsartittunut pilattaanermullu immikkoortortaqarfimmi nakorsat immikkut ilinniarsimasut amerlineqarnerat. Maannarpiaq DIH-mi nakorsaqarneq amerlanertigut pinasuartumik taamatullu pilersaarutaasumik katsorsagassat isumaginissaannut naammanneq ajorpoq. Akuttunngitsumik tamatuma kingunerisaanik katsorsaanissat pilersaarutaasut taamaatinneqarnerinik kinguneqartarpoq, pinasuartumik katsorsagassat tamatigut salliutinneqartarmata. Taamaatitsinerit napparsimasunut ataasiakkaanut, inuiaqatigiinnut tamarmiusunut, taamatullu peqqinnissaqarfimmut annertuumik akornutaasarput.

Suliniutissat allat
Aamma Peqqinnissaqarfimmi IT-mut kinguaattoorutit iluarseqqinnissaannut, peqqissuseq pillugu siunnersuisoqatigiinnik attuumassuteqanngitsunik pilersitsinissamut ingerlatsinissamullu, aammalu Peqqinnissaqarfimmi sanaartornermut pilersaarutip tamarmiusup suliarineqarnissaanut 4,8 mio. koruunit atorneqassapput.

Sukumiinerusumik paasisaqarusunnermi naalakkersuisup allattaa Birgithe Heinrich e-mail: bihe@nanoq.gl aqqutigalugu imaluunniit tlf: +299 34 66 17-imut attaveqarfigineqassaaq.