AtuartigukMeeqqat pillugit Siunnersuisoqatigiit nutaat toqqarneqarput
Nassiussisuuvoq: Meeqqanut, Inuusuttunut Naalakkersuisoqarfik
Meeqqat pillugit Siunnersuisoqatigiinnut Aka Olesen, Julius Jeremiassen aamma Paneeraq Olsen Naalakkersuisunit toqqarneqarput. Taakkua ilaasortat nutaat pingasut Meeqqat Oqaaseqartartuat peqatigalugu meeqqat atugarissaarnissaannik suliaqassapput, MIO-p suliaanut sammiviliissapput Kalaallit Nunaallu tamakkerlugu meeqqat pisinnaatitaaffiinik tapersersuissallutik.
Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede, ukiunut sisamanut tulliuttunut Meeqqat pillugit Siunnersuisoqatigiinnut ilaasortassanik nutaanik pingasunik toqqaavoq.
Meeqqat pillugit Siunnersuisoqatigiit meeqqanut suliassaqarfimmi periusissiat ineriartortinnissaannut ilaatigut Meeqqat Oqaaseqartartuat ikiussavaat, tassani meeqqanut attaveqarnissamik aamma attaveqaqatigiinnermik ilaatigut qulakkeerneqassalluni. Aammattaaq apeqqutini meeqqanut tunngassuteqartuni tamani Meeqqat Oqaaseqartartuata siunnersuinerani ilitsersuineranilu Meeqqat pillugit Siunnersuisoqatigiit ikiuuttassapput. Siunnersuisoqatigiinni ilaasortat ataatsimoorlutik qulequttanut meeqqanut tunngassuteqartunut paasisimasaqangaatsiarput.
”Ilaasortat nutaat meeqqanut suliassaqarfiup iluani ilinniagaqarluarnerat tunngavigalugu katitigaapput. Uannut qularnanngilaq meeraq qitiutillugu nunatsinni meeqqat pisinnaatitaaffii atugarissaarnerallu nukittorsarneqassasut pitsanngorsarneqarlutillu,” Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede oqarpoq.
Meeqqat pillugit Siunnersuisoqatigiit nutaat, pisortat oqartussaasuinit innersuunneqartut tassaapput:
- Aka Olesen, Peqqissutsimut Naalakkersuisoqarfimmi Periusissiornermut Pilersaarusiornermullu immikkoortortaqarfimmi immikkoortortaqarfimmut pisortaq
- Julius Jeremiassen, Avannaata Kommuniani atuarfiup pisortaa
- Paneeraq Olsen, Atugarissaarnermut pisortaaneq, Qeqqata Kommunianit innersuunneqartoq
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.